Die ältesten Regeln mittelalterlicher Hospitäler · die Hospitalregel-Texte:
 Cambrai/Kamerijk, Hospital S. Jean, Modus vivendi ... forma, 1227.06 

⁋Universis presentes litteras inspecturis Officialis cameracensis in domino salutem

Noveritis vos anno domini millesimo ccco quarto feria sexta ante festum natalem beati Iohannis baptiste litteras bone memorie Nicholai dei gratia cameracensis quondam episcopi sigillo suo proprio ut prima facie apparitione sigillatas non abolitas nec cancellatas nec in earum in aliqua parte viciatas vidisse tenuisse diligenter inspexisse ac de verbo ad verbum legisse in hac verba Nicholaus dei gratia cameracensis episcopus Universis presentes litteras inspecturis salutem in domino sempiternam litteras pie recordationis domini Godefridi cameracensis episcopi predecessoris et avunculi nostri vidimus et legimus de verbo ad verbum huiusmodi seriem continentes G dei gratia cameracensis episcopus universis presentem paginam inspecturis salutem in domino Noverit universitas vestra quod ad honorem dei et beate virginis marie et omnium sanctorum et ob salutem animarum ordinavimus modum vivendi in hospitali sancti Iohannis cameracensi sub hac forma Si quis in hospitali sancti Iohannis se deo famulaturus obtulerit non recipiatur in fratrem vel sororem nisi sex mensibus conversando inter fratres et sorores probetur et laborem domus modumque vivendi experiatur Tunc demum si provisoribus in eodem hospitali ex parte nostra constitutis placuerit seculo ac propriis et proprie voluntati renunciet votumque continencie sub stola in manu sacerdotis reponat Iugum obedientie super se tollat vestimentis non coloratis fratres ac sorores uniformiter induantur fratres a sororibus sorores a fratribus refectorium dormitorium et ceteras officinas habeant separatim frater cum sorore nunquam singularia ac secreta misceant colloquia nunquam solus cum sola sedeat ne forte suspicio suboriatur communibus cibis et potibus fratres et sorores reficiantur sine personarum acceptione nisi infirmitas vel evidens causa subfuerit Nulla in fratrem vel sororem recipiatur persona nisi administrandum infirmis et ad alia domui necessaria idonea inveniatur nisi ex speciali dispensatione nostra vel dictorum provisorum nostrorum septa loci nullus fratrum vel sororum sine certa causa et licentia presumat excedere et licentiata soror non sine testimonio et comitatu sororis alterius vel honeste persone per civitatem deambulet¶ ⁋Nullus fratrum vel sororum extra domum suam aquocumque invitatus intra cameracum manducet vel pluries quam bis bibat¶ ⁋In dormitorio in oratorio ac refectorio cum silentio sedeat verumptamen si inter comedentes necessitas aliquem loqui compellat surgat qui loqui debet et stando quod necessitas exigit breviter eloquatur singulis ebdomadibus ad minus semel ad capitulum conveniant de necessitatibus domus et excessibus si qui fuerint corrigendis tractaturi et excessus ad ordinationem iam dictorum provisorum corrigantur in domo satisfaciendo vel extra mittendo si necesse fuerit Nullus cum uxore sua recipiatur¶ ⁋Qui didicerint litteras vel qui dominicam orationem sciunt secundum ordinationem magistrorum domus dicant quod norunt Infirmus benigne recipiatur et quasi dominus domus cotidie antequam fratres comedant reficiatur secundum infirmitatem suam et quicquid in eius desiderium venerit si tamen poterit inveniri quod non sit ei contrarium secundum posse domus queratur donec perfecte sanitati restituatur Infirmi solliciter custodiantur si quis fratrum vel sororum proprietarius convictus fuerit graviter puniatur si vero talis decesserit tanquam excommunicatus habeatur et sine divino officio sepeliatur Tales infirmi recipiantur tamen qui tali morbo impediuntur quod non possunt hostiatim mendicare ordinent autem procuratores domus super hiis omnibus et super residentibus prout noverint expedire Ut autem hac ordinatio firma maneat presentem paginam sigillo nostro fecimus communiri Actum anno domini millesimo cco xxviio mense Iunio Nos itaque universa et singula ordinationes predicte prout superius sunt expressa grata ...entes et rata et auctoritate nostra pontificali approbamus confirmamus et presentes scripti communimus adicientes ex gratia speciali quod nos predictum hospitale sancti Iohannis cameracense sub nostra protectione suscepimus nostre umbraculo una cum personis et rebus eiusdem specialiter confovendum In quorum omnium testimonium et memoriam perpetue firmitatis presentes literas sigilli nostri munimine fecimus roborari Datum anno domini millesimo cco lxv dominica ante festum beati michaelis archangeli In quarum visionis et lectionis testimonio nos Officialis predictus sigillo sedis cameracensis presentibus literas duximus apponendum Datum anno et feria sexta supra dicte - collatio facta est