Die ältesten Regeln mittelalterlicher Hospitäler · die Hospitalregel-Texte:
 Cambrai/Kamerijk, Hospital S. Julien, Regule constitutio, 1220.05 

⁋/R/ Prepositus A decanus et quod cum eis est beate Marie Cameracensis Capitulum Vniuersis presentes paginas inspecturis Salutem in domino

Nouerit vniuersitas vestra Quod ad honorem dei et beate virginis marie et omnium sanctorum et ob salutem animarum ordinauimus in capitulo nostro de communi assensu fratrum die ad hoc statuto sine reclamatione aliqua modum viuendi in hospitali Sancti iuliani Cameracensi sub hac forma Si aliquis fidelis se obtulerit ad seruiendum deo in hospitali sancti juliani non recipiatur in fratrem et sororem donec conuersatus et probatus fuerit inter fratres et sorores per sex menses necnon et expertus fuerit labores domus et modum viuendi qui talis est et tunc consentimus si nostro placet Capitulo quod abrenunciet seculo et proprie voluntati et faciat votum continentie in hunc modum ponendo manum super stolam in manu presbiteri ad faciendum votum supradictum et extunc onus obedientie elevabit Vestibus non coloratis fratres et sorores induantur Ut sic universitas in utrisque diligenter observetur Sorores habeant semper de die scapularia grisia supra tunicas Refectorium dormitorium et alias officinas fratres a sororibus et sorores a fratribus habebunt separatas Secreta colloquia fratris cum sorore et sororis cum fratre cautius euitentur Frater cum sorore solus non sedeat in locode quo possit oriri mala suspicio Fratres et sorores communibus potibus et cibis reficiantur nisi causa accessionis subintrauerit per infirmitatem vel per negligentiam personarum Nulla persona in fratrem recipiatur vel sororem nisi ad ministrandum infirmis et ad alias domus vtilitates procurandas Vna persona ydonea et discreta inueniatur de capituli licentia speciali Nullus frater vel soror exeat loca domus sine certa causa et licentia sui superioris Soror cum habuerit licentiam exeundi per ciuitatem non vadat sine testimonio et sororis societate vel alterius honeste persone ¶ Nullus fratrum vel sororum extra domum suam quocumque loco in cameraco plus quam bis in die reficiatur ¶ In oratorio dormitorio et refectorio teneant fratres et sorores silentium nisi vrgens necessitas hoc requirat et tunc surgens dicat breuiter id quod sibi videbitur expedire ¶ Fratres et sorores saltem in ebdomada ad suum capitulum conueniant pro negociis domus pertractandis et suis excessibus corrigendis et tunc si aliqua fuerint inuenta corrigenda puniantur per satisfactionem infra domum vel ponantur extra per ordinationem procuratoris illiu hospitalis et hoc de consilio capituli cum necessitas hoc requirat ¶ Nullus cum sua vxore recipiatur ¶¶ ⁋Ille autem qui scient litteras vel orationem dominicam dicent illud quod scient secundum ordinationem procuratoris supradicti ¶ Infirmus benigne recipiatur et tanquam dominus domus reficiatur omni die antequam fratres et sorores reficiantur et hoc secundum infirmitatem suam Et si quid eius desiderio euenerit queri debet dumtamen non sit sue infirmitati contrarium et hoc fiat perfecte secundum facultates domus donec sit restitutus sanitati ¶ Infirmi diligenter custodiantur Si autem aliquis de conuersis fuerit conuictus de proprio grauiter puniatur et de tali excessu fiat sicut de excommunicato et sine diuino officio sepeliatur ¶ Tales autem infirmi recipiantur qui tali infirmitate sunt impediti quod non valeant hostiatim mendicare Canonicus procurator illius domus ordinabit super omnia predicta tam presentia quam futura prout melius cognouerit valitura Et de dubijs et rebus arduis recurret ad capitulum cui competit de talibus iudicare Et vt ista ordinatio firma maneat hanc presentem litteram nostro sigillo fecimus sigillari Actum fuit hoc anno ab incarnatione domini nostri ihesu cristi Millesimo Ducentesimo vigesimo mense Maij