Die ältesten Regeln mittelalterlicher Hospitäler · die Hospitalregel-Texte:
 Damme, Hospital, 1249.07 

⁋Nos scabini et tota communitas ville de Dam¶ ⁋notum facimus universis christi fidelibus presens scriptum inspecturis

quod nos pariter congregati pro statu domus beate Marie meliorando attendentes bona domus satis modica et respectu illorum expensas illius graviores et supra modum intollerabiles precipue propter multitudinem sanorum qui cotidie de bonis domus sustentantur volentes providere domui ne supra modum gravaretur imo ne succumberet in posterum pro utilitate ipsius domus et totius ville de communi consilio ville et consensu ordinamus et statuimus ac eidem domui firmiter proponimus quod nullus verecundus vel verecunda auctoritate nostra imponetur de cetero in dicta domo nullus etiam frater vel soror auctoritate nostra recipietur donec numerus verecundorum et verecundarum usque ad quattuor numerus vero fratrum et sororum usque ad quinque redigatur Predictis vero verecundis ad quattuor fratribus vero et sororibus ad quinque redactis si postea contingat aliquem de predictis verecundis decedere loco illius aliam personam quam eligemus de nostro communi consilio ad illam prebendam admittemus nec illa vacans proebenda aliene persone conferetur nisi prius in illam personam octo scabini vel plures in unum congregati concorditer consenserunt Fratre vero vel sorore decedente alter vel altera loco illius que expediat dicto domui auctoritate episcopi Tornacensis qui pro tempore fuerit vel ejus cui vices suas conmisit in hac parte et non de nostra auctoritate substituetur ita tamen quod numerus verecundorum et verecundarum quaternarium numerus vero fratrum et sororum quinarium numerum non excedat nisi excrescentibus redditibus et bonis ultra ea que necessaria erunt debilibus et infirmis ibidem decumbentibus pluribus sanis de ipsis bonis commode poterit provideri et tantum dictum numerum verecundorum fratrum et sororum de communi consilio episcopus et scabini poterunt ampliare secundum quod eis visum fuerit expedire infirmis vero non ponitur numerus eo quod veniunt et recedunt sed secundum necessitatem ipsorum et possibilitatem domus prout videbitur procuratori ad hoc specialiter a domino Tornacensi vel ejus vices in hoc gerente deputato benigne et amicabiliter colligentur Ad hoc singulis curtes domus a magistro et fratribus ponetur etiam sollicitus procurator qui fideliter procurabit bona illius curtis dum dicta domus curtem vel curtes habere contingat et singulis annis in mense Majo vel pluries si expediat super datis et receptis illius anni diligenter coram episcopo Tornacensi vel vices ejus gerente in hac parte et consilio ville et fratribus et sororibus domus in ipsa die beate Marie reddet rationem sue administrationis simili modo faciet magister domus de proventibus illius anni vel alius qui loco magistri bona domus specialiter procurabit In cujus rei testimonium et munimen presentes litteras communi sigillo ville nostre fecimus roborari Actum anno Domini MCCIL mense julio