Die ältesten Regeln mittelalterlicher Hospitäler · die Hospitalregel-Texte:
 Harelbeke, Hospital St. Niklaas, 1349.04.14 

⁋Universis presentes litteras inspecturis¶ ⁋Johannes miseratione divina episcopus Tornacensis salutem in Domino et presentibus dare fidem

Notum facimus quod cum dilectis noster in Christo filius dominus Egidius de Vlaerdslo dictus Smaelkin capellanus perpetuus in ecclesia Harlebeccensis nostre dioecesis de bonis sibi a Deo collatis quoddam hospitale sive domum Dei in dicta villa Harlebeccensis construxerit et dotaverit auctoritate nostra ordinaria et gratia confirmatur prout in litteris confirmationis nostre hujusmodi plenius continetur Nos ipsius domini Egidii necnon quattuor mulierum in dicto hospitali institutarum seu perpetuo instituendarum bonum propositum cum Deo confovere volentes eorum supplicationibus inclinati duximus taliter statuendum quod dictus dominus Egidius regimen et administrationem ipsius hospitalis et bonorum ejusdem et sororum institutarum seu instituendarum in eadem habeat quamdiu vitam duxerit in humanis et post ejus decessum dictum regimen administratio necnon institutio et discutio personarum ipsius hospitalis ad nos et episcopos Tornacenses successores nostros seu deputandos a nobis vel successoribus nostris plenarie revertatur Item volumus statuimus et etiam ordinamus quod in dicto hospitali quatuor mulieres vite laudabilis et honeste conversationis habentes et deferentes religionis habitum atque gestum eo modo sicut sorores hospitalis ville Curtracensis perpetuis temporibus instituantur quarum una habeat ministerium ipsius hospitalis solum modo per annum et computet de bonis ipsius hospitalis et ministerio ejusdem quolibet anno circa festum Johannis baptiste dicto domino Egidio nobis seu successoribus nostris prout superius est expressum et si placuerit dicto domino Egidio nobis seu successoribus nostris vel deputandis a nobis vel successoribus post dictum compotum dicta institutio in dicto ministerio reponatur et de novo instituatur in eodem tociens quociens dicto domino Egidio nobis seu successoribus visum fuerit expedire Item quod dicte sorores non exeant locum ipsius hospitalis nisi de licentia ministre predicte et hoc ex legitima causa et non aliter et quod dicte sorores intersint et consentiant computationi bonorum et administrationi dicte domus qua die oomputationis singulis annis renovetur ministra ut superius est expressum Item quod dicte sorores sub suo oorporaliter prestito juramento petant elemosinas ad opus dicti hospitalis in villa Harlebeccensi et alibi per indulgentias habitas et habendas si necessitas id exposcat Item volumus statuimus et etiam ordinamus quod dicte sorores sub regulis et statutis inferius annotatis vivant et etiam perpetuis temporibus invicem conversentur Primo videlicet quod dicte sorores recepte et imposterum recipiende in ipso hospitali seu domo Dei petant locum et panem pro Deo ad serviendum Deo et pauperibus humiliter et devote Item quod promittant persevarare ibidem usque ad mortem sobrie caste et devote vivendo promittant etiam superiori sue obedientiam reverentiam et fidelitatem officium sibi commissum faciant fideliter et voluntarie juxta posse jura hereditates et omnia bona ipsius hospitalis habita et habenda observant integraliter et pro posse deffendant superiores suos si necesse fuerit super hoc requirendo laborent toto casu observare concordiam et habere amicitiam murmurationes rixas et jurgia evitando nichil habeant in suo proprio nisi de licentia sue superioris non habeant nec ad se trahant suos carnales amicos vel alios quaelibet in pre judicium dicte domus ustensilia et jocalia et precipue ornamenta capelle dicte domus conservent in bono statu et si deficiant repetant vel emant de novo de bonis et proventibus dicte domus non vagentur per villam nec sedeant in domo vicini nec recedant a domo sine licentia ministre domus nec habeatur licentia sine causa Item juxta facultatea bonorum dicte domus recipiant pauperes leto vultu non lusores seu ribaldos nec mulieres leves seu juvenes vagabundos Item si quod absit rixa inter eas oriatur extra domum revelare non presumant sed tantummodo superiori sue denuncient ut super hoc in quo quelibet deliquerit puniatur quod si aliqua predictorum sororum in premissis seu aliquo premissorum deliquerit moneatur a sororibus caritative ut desistat et si non acquieverit denuncietur superiori ut juxta sua demerita puniatur et etiam corrigatur Reservantes nobis et successoribus nostris plenariam potestatem addendi diminuendi corrigendi interpretandi innovandi et etiam declarandi ordinationi nostre hujusmodi quociens visum fuerit expedire approbantes laudantes et ratificantes omnia et singula supra dicta In quorum omnium et singulorum testimonium et munime sigillum nostrum presentibus litteris duximus apponendum Datum et actum in domo nostra episcopali Tornacensi XIIII die mensis aprilis anno Domini millesimo CCCmo XLIXo